ປະຫວັດ ທ່ານ ຄຳພອນ ໄຊຍະສານ

ທ່ານ ຄຳພອນ ໄຊຍະສານ ເກີດເມື່ອວັນທີ 17/03/1947 ໃນຄອບຄົວຊາວນາ ທີ່ຄົງເຊໂດນ, ເມືອງຄົງເຊໂດນ, ແຂວງສາລະວັນ, ຊົນເຜົ່າລາວລຸ່ມ, ຖືສາສະໜາພຸດ, ເປັນລູກຊາຍຂອງທ່ານ ຈູ ແລະ ນາງ ນ໋ອຍ ໄຊຍະສານ, ມີອ້າຍເອື້ອຍນ້ອງຮ່ວມອຸທອນດຽວກັນທັງໝົດ 8 ຄົນ. ຕັ້ງແຕ່ຄາວຍັງເຍົາໄວ, ເພີ່ນເປັນຜູ້ໜຶ່ງທີ່ມີຄວາມມານະອົດທົນໃນການອອກແຮງງານ, ສະແຫວງຫາຄວາມຮູ້, ເມື່ອໄດ້ອາຍຸ 8 ປີ ເຖິງ 13 ປີ (1955-1960) ໄດ້ຮຽນຈົບຊັ້ນປະຖົມ ຢູ່ທີ່ບ້ານຄົງເຊໂດນ, ຈາກນັ້ນໄດ້ຮຽນຕໍ່ຊັນມັດທະຍົມສຶກສາຕອນຕົ້ນທີ່ແຂວງສາລະວັນ, ປາກເຊ ແລ້ວຂຶ້ນມາຮຽນຕໍ່ຊັ້ນມັດທະຍົມຕອນປາຍທີ່ນະຄອນຫຼວງວຽງຈັນ. ພາຍຫຼັງຮຽນຈົບມໍປາຍ ໄດ້ໄປສຶກສາທີ່ປະເທດການາດາ ຮຽນຈົບວິຊາເຕັກນິກໄຟຟ້າ ຂັ້ນອານຸປະຣິນຍາທີ່ສະຖາບັນເຕັກນິກ ເມືອງມົງເຣອານ.
   ພາຍຫຼັງຮຽນຈົບໄດ້ກັບຄືນປະເທດປີ 1972 ເພີ່ນໄດ້ສະມັກເຂົ້າເປັນພະນັກງານ-ກຳມະ ກອນລັດວິສາຫະກິດໄຟຟ້າລາວ ແລະ ໄດ້ຮັບມອບໝາຍປະຈຳການຢູ່ເຂື່ອນໄຟຟ້ານ້ຳງື່ມ 1. ຍ້ອນການເຄື່ອນໄຫວວຽກງານດີ, ມີຄວາມຮູ້-ຄວາມສາມາດໃນການຄຸ້ມຄອງ ແລະ ມີຄຸນສົມບັດ ທີ່ເໝາະສົມ, ປີ 1974 ເພີ່ນໄດ້ຖືກແຕ່ງຕັ້ງເປັນຫົວໜ້າສະຖານີໄຟຟ້າໂພນຕ້ອງ. ໃນໄລຍະຕໍ່ມາໄດ້ຖືກແຕ່ງຕັ້ງເປັນຫົວໜ້າໄຟຟ້າປາກເຊ ແຂວງຈຳປາສັກ, ນອກຈາກປະຕິບັດໜ້າທີ່ມີຜົນສຳເລັດແລ້ວເພີ່ນຍັງໄດ້ເຂົ້າຮ່ວມຂະບວນກຳມະກອນ ໄຟຟ້າລາວຢ່າງຫ້າວຫັນ ໃນການເຄື່ອນໄຫວທວງເອົາສິດອຳນາດການປົກຄອງເກົ່າແລະພວກຮຸກຮານ. ໃນປີ 1974 ເພີ່ນໄດ້ສ້າງຄອບຄົວກັບນາງ ແກ້ວດວງສີ ມີລູກຮ່ວມກັນ 3 ຄົນ ໃນນັ້ນຍິງ 1 ຄົນ. ຕະຫຼອດໄລຍະດຳລົງຊີວິດເປັນຫົວໜ້າຄອບຄົວ,ເພີ່ນເປັນຜູ້ທີ່ມີຄວາມມານະອົດທົນ, ສູ້ຊົນພັດຖະນາຄອບຄົວ, ປົວແປງຊີວິດການເປັນຢູ່ໃຫ້ນັບມືດີຂຶ້ນ ສາມາດລ້ຽງລູກເຕີບໃຫຍ່ເຂັ້ມແຂງ, ໄດ້ຮຳ່ຮຽນ ແລະ ປະກອບອາຊີບໄດ້ຕາມຄວາມມຸ້ງມາດປາດຖະໜາຂອງຄອບຄົວ ແລະ ເປັນທີ່ເພິ່ງ, ເປັນຜູ້ມີອຸປາລະຄຸນຕໍ່ຄອບຄົວ ແລະ ລູກຫຼານຍາດພີ່ນ້ອງຕະຫຼອດມາ.
   ບົນພື້ນຖານການປະຕິບັດໜ້າທີ່ ມີຜົນສຳເລັດ ທັງໄດ້ຮັບຄວາມໄວ້ເ້ອເຊື່ອໃຈຈາກພະນັກງານ, ກຳມະກອນ, ຊາວຜູ້ອອກແຮງງານ ແລະ ການຈັດຕັ້ງລັດວິສາຫະກິດໄຟຟ້າລາວ. ມາເຖິງປີ 1976 ໄດ້ຖືກແຕ່ງຕັ້ງໃຫ້ດຳລົງຕຳແໜ່ງເປັນຫົວໜ້າພະແນກພະລັງງານ ໄຟຟ້າ ວຽງຈັນ. ແລະເນື່ອງຈາກເພີ່ນ ມີພອນສະຫັວນໃນການຄົ້ນຄ້ວາຮຳ່ຮຽນ. ເຖິງປີ 1977-1984 ໄດ້ຮັບມອບໝາຍໃຫ້ໄປສຶກສາຄົ້ນຄ້ວາຕໍ່ຂັ້ນປະຣິນຍາໂທ ຂະແໜງ ວິຊາເຕັກນິກໄຟຟ້າ ທີ່ເມືອງຄາກົບ ລັດອູກຣາອິນ, ອະດີດສະຫະພາບໂຊວຽດ.
   ພາຍຫຼັງກັບຄືນປະເທດ ທ່ານໄດ້ສຶບຕໍ່ປະຕິບັດໜ້າທີ່ດ້ວຍຄວາມຫ້າວຫັນ, ນຳໃຊ້ຄວາມຮູ້ຄວາມສາມາດຂອງຕົນທີ່ໄດ້ຮຽນມາເຂົ້າໃນວຽກງານຢ່າງປະດິດສ້າງ ແລະ ມີຜົນສຳເລັດໃນຫຼາຍດ້ານ. ດັ່ງນັ້ນ ມາຮອດປີ 1984-1986 ທ່ານຈຶ່ງຖືກແຕ່ງຕັ້ງເປັນຫົວໜ້າພະແນກເຕັກນິກ ຟຟລ. ປີ 1986-1988 ທ່ານໄດ້ຖືກແຕ່ງຕັ້ງເປັນຫົວໜ້າ ໂຄງການສ້ອມແປງປັບປຸງສະຖານີ ໄຟຟ້າລາວ. ປີ 1988-1990 ທ່ານໄດ້ຖືກແຕ່ງຕັ້ງເປັນຫົວໜ້າພະແນກສະຖານີ ແລະ ສາຍສົ່ງ ຟຟລ. ປີ 1990 ເຖິງ 2005, ຍ້ອນຄວາມສາມາດດ້ານການນຳພາຄຸ້ມຄອງ ແລະ ໄດ້ຮັບຄວາມໄວ້ວາງໃຈຈາກຖັນແຖວກຳມະກອນ ແລະ ການຈັດຕັ້ງຂັ້ນເທິງ, ເພີ່ນຈຶ່ງໄດ້ຮັບການແຕ່ງຕັ້ງໃຫ້ເປັນຮອງຜູ້ອຳນວຍ ການໃຫຍ່ລັດວິສາຫະກິດໄຟຟ້າລາວ. ມາເຖິງ ວັນທີ 23/01/2006-02/11/2007 ທ່ານໄດ້ຖືກແຕ່ງຕັ້ງໃຫ້ດຳລົງຕຳແໜ່ງເປັນຜູ້ອຳນວຍການໃຫຍ່ ພ້ອມກັນນັ້ນກໍ່ໄດ້ຖືກແຕ່ງຕັ້ງບົ່ງໂຕເປັນເລຂາຄະນະພັກຮາກຖານລັດວິສາຫະກິດໄຟຟ້າລາວ, ເປັນກຳມະການສະພາບໍລິຫານລັດວິສາຫະກິດໄຟຟ້າລາວ, ກຳມະການສະພາບໍລິຫານ ບໍລິສັດ ເທີນ-ຫີນບູນ ພາວເວີຈຳກັດ ແລະກຳມະການສະພາບໍລິຫານ ບໍລິສັດ ໄຟຟ້ານ້ຳງື່ມ 2 ພາວເວີຈຳກັດ ແລະ ໄດ້ອອກພັກຜ່ອນ ຮັບເບັ້ຽບຳນານ ນັບແຕ່ວັນທີ 01/01/2008 ແຕ່ນັ້ນມາ.
   ຕະຫຼອດໄລຍະແຫ່ງການເຄື່ອນໄຫວວຽກງານ ແລະ ດຳລົງຕຳແໜ່ງຕ່າງໆຜ່ານມານັ້ນ ທ່ານ ຄຳພອນ ໄຊຍະສານ ລ້ວນແລ້ວແຕ່ໄດ້ອຸທິດເຫື່ອແຮງ ແລະ ສະຕິປັນຍາຂອງຕົນປະກອບ ສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ກໍຄືພັດທະນາຄອບຄົວຢ່າງບໍ່ຮູ້ອິດເມື່ອຍ. ໃນທຸກໄລຍະ ທ່ານ ຄຳພອນ ໄຊຍະສານ ປະຕິບັດໜ້າທີ່ວຽກງານນັ້ນ ເພີ່ນເປັນຜູ້ໜຶ່ງທີ່ໄດ້ປະກອບສ່ວນເຕົ້າໂຮມຄວາມສາມັກຄີ, ສ່ວຍເຫຼືອຮັກແພງໝູ່ເພື່ອນ, ເປັນພະນັກງານຜູ້ໜຶ່ງທີ່ປະຕິບັດລະບຽບວິໄນ, ມະຕິຄຳສັ່ງຂອງຂັ້ນເທິງ ແລະ ມີສະຕິຕໍ່ການຈັດຕັ້ງໄດ້ດີ, ມີຄຸນສົມບັດສິນທຳ, ມີຄວາມຈົງຮັກພັກດີຕໍ່ປະເທດຊາດ, ຕໍ່ປະຊາຊົນ ແລະ ຖັນແຖວກຳມະກອນ ຊາວຜູ້ອອກແຮງງານ ຈິ່ງເຮັດໃຫ້ມີຄຸນງາມຄວາມດີ ແລະ ໄດ້ຮັບຄວາມໄວ້ເນື້ອເຊື່ອໃຈຈາກການນຳພັກ-ລັດ, ລັດວິສາຫະກິດໄຟຟ້າລາວ ແລະ ການຈັດຕັ້ງຂັ້ນເທິງ ເຮັດໃຫ້ເພີ່ນໄດ້ມີເງື່ອນໄຂມາດຖານເປັນພະນັກງານຫຼັກແຫຼ່ງ ເພີ່ນຈຶ່ງໄດ້ເຂົ້າສັງກັດອົງການຈັດຕັ້ງ ແລະ ໄດ້ຮັບການຍ້ອງຍໍປະເພດຕ່າງໆດັ່ງນີ້ :
-   ເຂົ້າສັງກັດລັດ         22/01/1973
-   ເຂົ້າການປະຕິວັດ         02/12/1975
-   ເຂົ້າເປັນຊາວໜຸ່ມ         24/12/1978
-   ເຂົ້າເປັນສະມາຊິກກຳມະບານ      03/01/1987
-   ເຂົ້າເປັນສະມາຊິກພັກສຳຮອງ      09/07/1985
-   ເຂົ້າເປັນສະມາຊິກພັກສົມບູນ      16/06/1986
ດ້ວຍຜົນງານອັນດີເດັ່ນ ແລະ ຄຸນງາມຄວາມດີຂອງທ່ານ ຄຳພອນ ໄຊຍະສານ ທີ່ໄດ້
ປະກອບສ່ວນເຂົ້າຮ່ວມໃນພາລະກິດປົກປັກຮັກສາ ແລະພັດທະນາປະເທດຊາດ ເວົ້າລວມ ແລະ ການປະກອບສ່ວນພັດທະນາຂະແໜງໄຟຟ້າໃຫ້ມີການເຕີບໃຫຍ່ເຂັ້ມແຂງເວົ້າສະເພາະ. ພັກ-ລັດ ແລະ ການຈັດຕັ້ງ ລັດວິສາຫະກິດໄຟຟ້າລາວ ຈິ່ງໄດ້ຍ້ອງຍໍປະເພດຕ່າງໆໃຫ້ເພີ່ນດັ່ງນີ້ :
1.   ຫຼຽນໄຊອິດສະຫຼະຊັ້ນ III    1 ໜ່ວຍ.
2.   ຫຼຽນໄຊແຮງງານຊັ້ນ III   2 ໜ່ວຍ.
3.   ຫຼຽນກາແຮງງານ      2 ໜ່ວຍ.
4.   ໃບຍ້ອງຍໍຂັ້ນກະຊວງ ແລະ ໜ່ວຍງານຕ່າງໆຈຳນວນໜຶ່ງ.
ຕະຫຼອດໄລຍະເວລາທີ່ ທ່ານ ຄຳພອນ ໄຊຍະສານ ໄດ່ເຈັບປ່ວຍຜ່ານມາ, ຜູ້ເປັນພັນລະຍາ
ພ້ອມລູກຫຼານຄອບຄົວ ໄຊຍະສານ ແລະ ການຈັດຕັ້ງລັດວິສາຫະກິດໄຟຟ້າລາວ ໄດ້ເອົາໃຈໃສ່ປິ່ນປົວ ບົວລະບັດເປັນຢ່າງດີທີ່ສຸດ ໂດຍໄດ້ນຳສົ່ງໄປປິ່ນປົວຢູ່ໂຮງໝໍທັງພາຍໃນ ແລະ ຕ່າງປະເທດ ຊຶ່ງແພດໝໍ ແລະ ຄອບຄົວກໍ່ໄດ້ເອົາໃຈໃສ່ປິ່ນປົວຢ່າງສຸດຄວາມສາມາດ ທຸກນາທີ, ທຸກໄລຍະການປິ່ນປົວ, ທ່ານເຈັບປວດ, ທົນທຸກທໍລະມານຂອງເພີ່ນຫຼາຍສຳ່ໃດ ຄອບຄົວລູກຫຼານກໍ່ມີຄວາມເຈັບປວດຫຼາຍສຳ່ນັ້ນເໝືອນກັນ, ແຕ່ອາການຂອງທ່ານກໍ່ຍັງບໍ່ດີຂຶ້ນ, ມາເຖິງວັນທີ່ 19/04/2008 ເວ ລາ 04 ໂມງ 40 ນາທີ ເພີ່ນກໍ່ໄດ້ຈາກພວກເຮົາໄປຢ່າງບໍ່ມີຈະວັນກັບມາ ດ້ວຍພະຍາດຂອງເພີ່ນລວມອາຍຸໄດ້ 61 ປີ, ຄົງເຫຼືອໄວ້ແຕ່ຄຸນງາມຄວາມດີຂອງເພີ່ນໃຫ້ລູກຫຼານ, ຄອບຄົວ ແລະ ອົງການຈັດຕັ້ງລັດວິສາຫະກິດໄຟຟ້າລາວ .ການເສຍຊີວິດຂອງທ່ານ ຄຳພອນ ໄຊຍະສານ ເຮັດໃຫ້ລັດວິສາຫະກິດໄຟຟ້າລາວ ໄດ້ສູນເສຍພະນັກງານຂັ້ນລະດັບສູງ, ຜູ້ນຳທີ່ເປັນແບບຢ່າງທີ່ດີຜູ້ໜຶ່ງ ທັງນຳເອົາຄວາມໂສກເສົ້າເສຍດາຍ ແລະ ຄວາມອາໄລອາວອນອັນສຸດຊຶ້ງໃຫ້ແກ່ພະນັກງານກຳມະກອນ ແລະ ຄອບຄົວ, ຍາດພີ່ນ້ອງຜູ້ຢູ່ໃກ້ ແລະ ຢູ່ໄກ.

	Author	Topic: ປະຫວັດ ທ່ານ ຄຳພອນ ໄຊຍະສານ (Read 1878 times)
0 Members and 1 Guest are viewing this topic.